قال أحمد حسام “ميدو”، خلال تصريحات تليفزيونية، إن المدير الفني للزمالك أحمد عبد الرؤوف تعرض للظلم في بطولة السوبر المصري، بعد أن خاض البطولة بجهاز فني يضم عناصر تعمل معه لأول مرة.
ميدو: الزمالك محتاج مراجعة
وأضاف ميدو: اختيار عبد الرؤوف إنه يخوض بطولة السوبر بالجهاز ده كان ظلم كبير جدًا، لأنك بتدخل بطولة مهمة بأفراد أول مرة يشتغلوا معاك، ودي نقطة فاصلة.
وأكمل: الزمالك كسب بيراميدز وعمل ماتش محترم، لكن لما واجه فرقة متحضرة كويس ووراها جمهورها، مشاكله ظهرت، مش بس في تحضير السوبر، لكن كمان في تحضير الموسم كله.
وأوضح ميدو أن الفريق اضطر للاعتماد على لاعبين لم يكن مخططًا لاستخدامهم في المباريات الحاسمة، قائلًا: “النهارده ربنا أراد إنك تحتاج لعيبة كنت فاكر إنك مش هتحتاجهم، واللاعيبة دي قالتلك رسالة واضحة: إحنا مش لعيبة الزمالك”.
وأردف: فيه أربع لعيبة شاركوا في الماتش، بدأ منهم تلاتة، ومش هقول إنهم اختيارات سيئة، لكن عيب إنهم يلبسوا فانلة الزمالك، خصوصًا إنهم جايين بفلوس كتيرة.
وطالب ميدو بمراجعة شاملة داخل النادي، مشددًا على أن الزمالك كيان كبير لا يجب أن يُترك بهذه الصورة، قائلا: “الزمالك ليه أصحاب، وأصحاب الزمالك الحقيقيين هم جمهوره”.
وكشف ميدو، عن تفاصيل خطة تطوير كان قد طرحها من قبل لمجلس الإدارة، موضحًا: “البلان كانت واضحة، جون إدوارد ييجي مدير رياضي عنده خبرات، ومعاه تكنيكال دايركتور محترف ولاؤه لمجلس الإدارة، علشان يتخلق توازن يخلي المجلس ياخد قرارات صح”.
واختتم حديثه: اللي حصل في الزمالك مش إدارة كرة قدم، لأن الناس كانت فاكرة إن الكورة بتدار زي أي لعبة تانية، وده غلط، الكورة ليها خصوصيتها ورجالها اللي فاهمينها. الغلط مش عيب، لكن العيب إنك متصلحوش، لأن جمهور الزمالك عمره ما هيسيب حد ييجي على ناديه، وجمهور الزمالك بيحب ناديه أكتر من أي شخص.
