نشر المحامي محمد رمضان أبو بيبرس، محامي طبيبة الامتياز، الدكتورة أمنية سويدان، مفجرة أزمة انتهاكات مستشفى الشاطبي، منذ قليل، توضيحا عبر صفحته الشخصية على موقع التواصل الاجتماعي “فيسبوك”، حول ما نقلته بعض الصحف والمواقع أمس عن التحقيقات.
وقال: “الدكتورة أمنية سويدان أُخلي سبيلها بكفالة، ودا كان المهم بالنسبالي لإنها متستحقش مننا إنها تمر باللي مرت به، من دخول بيتها و يتاخد أبوها و أمها و تتعرض علي نيابة تاني يوم، و كان ممكن كمان تتحبس! فالحمد لله”.
وأضاف: “أما ردي على التشويه بحقها ففي رأيي أن كل من ادعى وروّج وييشكك في شهادة البنت الجدعة دي، اللي استحملت ظرف وضغط كبير، هو اللي يستحق يتقال عليه مريض نفسي. المريض النفسي هو اللي مش شايف الانتهاكات والسوء اللي في المستشفيات الحكومية. المريض النفسي هو اللي بعيد عن الواقع وقرر من قبل ما البنت تتاخد من بيتها أصلاً يروّج إنها مؤامرة كونية ضد المنظومة الصحية”.
وتابع: “من منكم معندهوش أم، أو أخت، أو قريب، أو جار حكى له عن كوارث طبية بتحصل يومياً في القطاع الصحي وانتهاكات؟! اه ياخوانا، كلام أمنية وكلام كل حد جدع قرر يكتب شهادته ضد أي انتهاك هو كلام صادق وحصل وبيحصل أكتر من كده كمان، بس الناس فاهمة وواعية إنها لو كتبت هتمُر بتجربة مريرة فبتخاف وتسكت. مهنة الطب والبالطو الأبيض نفسه في مصر عارفين إن في أخطاء وممارسات بتوصل لحد الجريمة، وبيتم الطرمخة عليها وإفساد للأدلة لمصلحة مستفيدين إن الجرايم دي متتفتحش”.
وأردف: “الغلبان يا ناس يا محترمة في مصر سبيله الوحيد لما بيتعب، أو مراته بتولد، أو ابنه بيسخن بليل هي مستشفيات زي الشاطبي وعبد الناصر والميري، اللي الغلبان بيروح يتلقى الخدمة الطبية هناك لانه مضطر علشان فقير، وبتشكل أهمية كبيرة له ولعيلته وجيرانه. لأن لو ظروفه المادية أفضل مش هيتردد يروح مستشفى خاص، اللي بالمناسبة حتى قطاع الصحة الخاص فيه كوارث بتحصل؛ في المستشفيات العامة نشوف ذل وإهانة وانتهاكات وبلطجة وبنسمع عن أخطاء طبية تصل للقتل ومعاملة زي الزفت، بس الغلبان مضطر لأنه مش هيعرف يتلقى الخدمة دي من مرتبه اللي مش بيكفيه لآخر الشهر، وبيرضى ويسكت وبيفضل كاتم في نفسه”.
وزاد: “الي شايف إن المستشفيات عندنا جميلة وحلوة ومتطورة وعظيمة هو اللي عنده خلل نفسي. ملف الصحة في مصر محتاج كل شريف، أولهم الدكتور نفسه ونقابة الأطباء إنها تاخد المبادرة ونقول بشكل جاد وفيه شفافية إنها جزء من توجه عام لإصلاح المنظومة بشكل جاد، وتبدأ تعترف بالأخطاء وتحاسب كل واحد بيسيء للمهنة. والإصلاح الجذري لن يأتي ببيانات وتجميل، الإصلاح هيبدأ لما الدولة بأجهزتها الأمنية اللي جريت تقبض عالشاهد تستخدم نفس سرعتها دي في إنها تحقق وتحاسب كل واحد أجرم في حق مريض في مصر، يقعدوا بجد ويفتحوا الملفات دي من غير طرمخة، لما يبقى في لجنة بجد تحاسب الدكتور اللي بيغلط ويهمل وتجيب حق المريض الغلبان من غير ما تضيع الأدلة، ولما نوفر للدكتور النظيف اللي عايز يشتغل بيئة محترمة ومرتب يعيشه ويوفر أدوية ومستلزمات في المستشفى عشان المريض ميتذلش”.
وتابع: “الاعتراف بالمرض هو أول خطوة في العلاج، وطول ما بنقول كله تمام هنفضل ندفن في عيوبنا والناس هي اللي بتدفع التمن من صحتها وحياتها. و أمنية و اللي زي أمنية ميستحقوش مننا غير كل احترام على الحالة اللي ممكن بيها نصحح أخطاء كتيرة وبإيدينا نموتها و ندعي إن الكلام خيال و ناتج عن مرض نفسي”.
