استنكر الدكتور محمد زهران، المرشح في انتخابات مجلس النواب على المقعد الفردي بدائرة المطرية، مطالبة حي المطرية له بدفع 30 ألف جنيه كمصاريف دعاية انتخابية، مؤكدًا أنه لم يعلق أي لافتات أو مواد دعائية تحمل اسمه.
مرشح يستنكر مطالبته بدفع 30 ألف جنيه دعاية
وقال زهران في منشور عبر فيسبوك: “حي المطرية عايز مني 30 ألف جنيه دعاية، 10 آلاف تأمين و20 ألف جنيه دعاية انتخابية، مع إن مافيش ولا يافطة باسمي”.
وتابع: “طيب ما تاخدوا من اللي دقوا الخشب في الشوارع وكسروا البلاط والأرصفة وأسوار المدارس بل ودقوا خشب داخل المدارس وفي الميادين، دول المفروض يدفعوا التكلفة الفعلية مش 30 ألف بس”.
وأضاف: “واحد زميلي قال لي ادفع بدل ما يشيلوا اليفط بتاعتك ؟!!، زي ما عادل إمام ما دفع لهيئة التليفونات علشان مايشيلوش العدة، مع إنه ماعندوش عدة، والله حاجة عجيبة”.
وأكمل: “حضراتكم المفروض اللي هيعلق يفط يجب إن ياخد تصريح قبل ما يعلق يفط، ويدفع تأمين كبير مقابل التكسير وتدمير الشوارع وأسوار المدارس، لكن واحد ما علقش ولا يافطة ولا حتى ورقة A4، هي الكحكة في إيد اليتيم عجبة”.
