تراجع معدن الذهب على الصعيد المحلي والعالمي، تراجعًا لم يشهده المعدن الأصفر منذ 3 أشهر خلال يومي الجمعة والسبت خاصة يوم الجمعة.
تعود الأسباب وراء هذا التراجع الكبير إلى ارتفاع سعر الدولار الأمريكي، وتراجع توقعات خفض الفائدة، مع هبوط سعر الأونصة العالمة بنسبة 3% لتختتم جلسات تداول هذا الأسبوع مسجلة أقل سعر لها 4329 دولارًا، بعد أن كانت تقترب من 4500 دولار، وفقًا لبيانات البورصة العالمية للمعادن”CME Group”.
سوق الذهب المصري مرتبط ارتباطا وثيق بسوق الذهب العالمي
يتأثر الاقتصاد المحلي بسعر الأوقية العالمي، بشكل مباشر، إذ سجل سعر الأوقية العالمة حاليا نحو 4328 دولارًا للأوقية الواحدة، إذ يعتمد سوق الذهب المصري على التطورات الخارجية والأسعار العالمية، هكذا بدأ المهندس نادي نجيب، سكرتير عام شعبة الذهب بالغرفة التجارية بالقاهرة، حديثه مع “القصة”.
وأردف أن”عند حدوث أى ارتفاع أو انخفاض يأثر بشكل مباشر على السعر المحلي للمعدن الأصفر، مضيفًا أن”أسعار الذهب يوم السبت 6 يونيو 2026 بدأت في الارتفاع مقارنة بأسعار الذهب الجمعة 5 يونيو 2026، إذ سجل اليوم الذهب عيار 21 نحو 6780 بعد أن تراجع إلى 6450 جنيها، مما يؤدي على عودة الذهب إلى الارتفاع بشكل تدريجي”.
ويشير إلى أن”البورصة العالمية في إجازة لأنها تغلق من مساء يوم الجمعة ثم تعود للعمل صباح يوم الإثنين، وهذا يعني أن يوم الإثنين سيشهد سوق الذهب أسعار أخرى واحتمال كبير أن تكون مرتفعة أكثر مما وصلت له الآن”.
ويختتم حديثه بالتأكيد، أن”القرارات والتوجيهات الاقتصادية والسياسية، التي أصدرها الرئيس دونالد ترامب، قد أثرت على سوق الذهب العالمي، عن طريق تراجع قيمة الأوقية، مما أدى إلى تأثر السوق المحلي بانخفاض سعر الأوقية، فعند استقرار هذه التطورات وثبات تصريحات الرئيس الأمريكي سيعود الملازم الأمن في مواصلة الصعود”.
من جانبه يقول الدكتور أسامة زرعي خبير اقتصاد المعادن: “أرقام التوظيف امبارح خلت الذهب يقع ودلوقتي بقينا قصاد التساؤل المهم دلوقتي وهو، الذهب رايح فين؟”.
ويضيف زرعي في حديثه مع”القصة”: “أرقام إمبارح قفلت الباب قصاد أي خفض للفائدة وممكن كمان يخليه يهدي شوية لو عايز يرفع الفايدة والثقة دي جايبها من رقم الأجور اللي جه عند 3.4%، لأن تقرير الوظائف فيه رقمين مهمين عدد الوظائف ونمو الأجور”.
ويشير: “الأجور دي مهمة، لأن فيه نوع من التضخم بيخوّف الفيدرالي أكتر من أي حاجة، وهو التضخم اللي مصدره الأجور فتخيل لو الأجور بتطلع بسرعة، فالناس هتاخد فلوس أكتر هتصرف أكتر الأسعار هتطلع الناس هتطلب زيادة تاني، وهكذا في حلقة جهنمية صعب جداً السيطرة عليها وده أخطر أنواع التضخم، لكن لما الأجور تطلع بشكل عادي زي دلوقتي ده بيقول إن سوق العمل قوي بس مش بيغلي بشكل خطير، يعني المتانة موجودة لكنها مش بتولّد ضغط تضخمي خارج عن السيطرة، وبكده الفيدرالي هيثبت سعر الفايدة الاجتماع الجاي”.
ويؤكد: “الفيدرالي هنا محشور في 3 محاور:
لو رفع الفايدة علشان التضخم 3.8%، هيلاقي تكلفة خدمة الدين ترتفع، ولو ثبت التضخم يستمر فوق الهدف وهنا تتآكل المصداقية، ولو خفض فالدولار يضعف والتضخم يزيد” موضحًا أن”كل مسار من المسارات الثلاثة كويس للذهب على المدى البعيد، وده أفضل حاجة في الموضوع، العوائد بتاعت السندات، يوم 5 يونيو العائد على السنتين طلع عشر نقاط بس عائد العشر سنوات طلع ست نقاط، لأن خبر الوظائف القوي اثر بشكل مباشر على التوقعات القريبة، الناس قالت الفيدرالي غالباً هيرفع الفائدة قريب، فالعائد القريب اللي بيعكس القرارات القريبة ارتفع بسرعة أما العائد الطويل فاتحرك أبطأ، لإنه بيشوف صورة أوسع وأبعد وده حرك الذهب بشكل أسرع”.
ويضيف أن”في سوق المشتقات لما السعر ينزل فجأة البنوك بتضطر تبيع عقود علشان تحمي نفسها، وبيعها ده بيخلي السعر ينزل أكتر فيضطروا يبيعوا أكتر وهكذا يعني البيع بيولّد بيع وسوق المشتقات هنا بيقولنا شويه حاجات زي: حجم كل الرهانات النهاردة على الذهب هو تريليون دولار والتحركات فوق أو تحت عاملة مجمل 77 مليار دولار وده مجموع المكاسب، والخسائر فعلاً في اللحظه دي، وكل تحرك بمقدار 100 دولار بيديني حوالي 20ل30 مليار مكسب او خساره”.
ويوضح أن”جي بي مورجان شايل فوق 300 مليار، وسيتي حوالي 142 مليار، وبنك أوف أمريكا حوالي 61 مليار المضاربون والصناديق هم الطرف المقابل اللي بيشتري الرهانات على الاتجاه، البنوك مش بايعة على المكشوف، هي بتبيع في شيكاغو وتشتري نفس الكمية في لندن، فمركزها الصافي قريب من الصفر”.
ويؤكد على أن “المضاربون هم أكتر ناس خسرت، كان عندهم 1760000 اوقية فالخساره حوالي 2.64 مليار دولار في يوم واحد، ومنتجين الذهب والبائعون هم الي كسبوا وكسبوا نفس المبلغ تقريباً على مراكز البيع و البنوك صانعة، السوق خرجت متعادلة ربحها من العمولة والفرق مش من الاتجاه”.
ينوه إلى أن “بورصة شيكاغو هي أكبر بورصة عقود ذهب آجلة في العالم والذهب، في الخزائن دي نوعين النوع الأول اسمه المسجل وده بيكون ذهب جاهز ومتاح فوراً للتسليم لأي حد عنده عقد وعايز يستلم معدن حقيقي، النوع التاني اسمه الموهل، ده ذهب متخزن في نفس المستودعات بس صاحبه لسه محطوش للتسليم”.
ويشير إلى أن “النوع الأول المسجل دلوقتي فيه منه 15,300,000 أوقية بس النقطة المهمة إنه نزل 3.3% في 30 يوم، يعني خرج منه حوالي 516,000 أوقية في شهر، النوع الثاني الموهل، فيه منه حوالي 9,000,000 أوقية ونزل برضه 3.4%، يعني خرج منه حوالي 457,000 أوقية، يعني الاجمالي حوالي 24,300,000 أوقية خرج منهم حوالي 974,000 أوقية في الشهر”.
ويوضح أن”النوعين نزلوا بنفس النسبة تقريباً مع بعض، لإن لو كان الذهب بيتنقل من نوع للتاني بس، كان نوع هينزل ونوع هيطلع، لكن لإن الاتنين بينزلوا سوا، ده معناه إن الذهب بيخرج من البورصة كلها مش بيتحرك جواها وخروج الذهب الحقيقي من الخزائن معناه إن فيه ناس بتسحب معدن فعلي بره النظام يعني طلب حقيقي مش ورقي”.
ويضيف أن”الذهب المطلوب حقيقي متغطي بس بنسبة 43.3%، والبنوك والشركات مستخدمة نسبة رفع تعادل 2.31، وده معناه إن الفيزيكال نفسه عمره ما هيغطي لا الطلب الحقيقي ولا الورق”.
ويستدرك أن “كان فيه تجمّع كبير لعقود خيارات عند مستويات قريبة من 4400 لـ 4500 وده عمل حاجة زي الحيطة ولما السعر كسر 4400 والبنوك البايعة لهذه العقود اضطرت تبيع عقود آجلة علشان تحمي نفسها، البيع ده دفع السعر ينزل أكتر لحد 4320. يعني الحيطة لما اتكسرت، السعر وقع بسرعة وراها وبكدا فتح المجال قصاد 4200 و 4050 كافضل دعم حاليا”.
ويؤكد أن”في يوم الانهيار اتطلب حوالي 27,000 أوقية معدن حقيقي راح لأصحابه. إجمالي العقود اللي مستنية تتسلم حوالي 3,000,000 أوقية، نسبة ده للمخزون اتنين بالمية، يعني مش ضغط قوي، نفهم إن في ناس بتسحب ذهب حقيقي في نفس يوم ما السعر بينهار، والمضارب مبياخدش معدن، فدول مؤسسات بتشتري وهو رخيص. السعر بينزل بالورق والمعدن بيتسحب بصمت، وده في الاغلب علامة علي ان القاع قرب”.
ويشير إلى أن”المضاربين كان معاهم 17,600,000 أوقية فخسارتهم حوالي 2.64 مليار دولار. الرقم ده 176,000 عقد صافي صعود. وقريب من الذروة التاريخية البالغة حوالي 200,000 عقد، وده يقولنا إن السوق كان مكتظ بمراكز الشراء قبل الانهيار مباشرةً، يعني خطر التصفية الإضافية مرتفع مش منخفض، لسه فيه شويه حيل للبيع يوم 12 يونيو هنعرف، لو باعوا تاني بشكل ضخم يبقى البائعين قرّبوا يخلصوا وممكن نكون قربنا للقاع، لو فضلوا محمّلين بمراكز شراء قريبة من الذروة يبقى النزول لسه فيه”.
ويضيف أن”صناديق التحوط، الخاسر الأكبر، رهانين على الطلوع بـ 9.740,000 أوقية، الخساره حوالي 1.46 مليار دولار في يوم واحد، كما أنهم حاملو الصناديق المتداولة، خساره على الورق، شايلين حوالي 4.137 طنا، أي حوالي 133,000,000 أوقية”.
ويشير إلى أن”خسارتهم حوالي 19.95 مليار دولار، يعني قرب العشرين مليار، لكنها دفترية على الورق فقط، محدش باع، ولو السعر رجع طلع بتختفي، والمنتجون والبائعون، الرابح، كانوا في جهة البيع، فلما السعر نزل كسبوا، لإنهم أمّنوا سعر أعلى من السعر الحالي، كما أن البنوك صانعة السوق، متعادلة، محمية من الاتجاهين بالتحوّط، ربحها من فرق السعر والعمولة فقط، مش من النزول”.
ويختتم حديثه بالتأكيد أن”في النهاية منطقه ما بين 4200ل4050 هتفضل دعم قوي وهتفضل مستوي 5000-5500-6000 هدف لم يتغير”.
