في وقتٍ يئن فيه الناس من موجة الغلاء، وبينما تتضاعف تكاليف المعيشة يومًا بعد يوم، اختار ثلاثة شباب من محافظة القليوبية أن يواجهوا الأزمة بطريقة مختلفة.. بالخير.
كيف بدأت الفكرة؟
ففي يوم 18 سبتمبر الماضي، أي قبل دخول المدارس بيومين فقط، وُلدت “من 10 بقت 7 كلنا واحد”، التي أطلقها كل من رامي سعد البنا وكريم المندي ومحمود عمر، لتخفيف أعباء التنقل عن طلاب المدارس، وتشجيع الأطفال على التعاون ومساعدة الغير.
يقول رامي سعد البنا، أحد مؤسسي المبادرة: الفكرة بدأت بموقف بسيط قبل المدارس بيومين، ربنا ألهمني ساعتها إني أعمل حاجة خير. حسيت إن في رسالة وصلتلي، فبدأت أفكر إزاي أقدر أساعد، وفعلاً اتكلمت مع كريم ومحمود، وقررنا نبدأ على طول قبل العام الدراسي الجديد.
المبادرة اعتمدت على تخفيض أجرة التوكتوك للطلاب، بحيث يكون المشوار الذي كان بعشرة جنيهات لا يتجاوز سبعة جنيهات فقط، رغم ارتفاع أسعار البنزين والسولار.
“بدأنا قبل زيادة البنزين، لكن لما الأسعار زادت، قررنا ما نزودش الأجرة، بالعكس، خفضناها أكتر، إحنا مش بندور على مكسب، بندور نساعد أهل بلدنا، ونعلم أولادنا يعني إيه خير.”
ويضيف: المبادرة ليها هدف تاني مهم، وهو إن الطفل من صغره يتربى على الأخلاق والمساعدة لما يشوف حد محتاج، يمد له إيده لما يشوف طفل من ذوي الهمم، يساعده. إحنا بنحاول نخلق جيل يعرف يعني إيه رحمة وإنسانية من بدري.
المبادرة لم تقتصر على دعم الطلاب فقط، بل شملت أيضًا خدمة ذوي الهمم، بعد أن لاحظ القائمون عليها صعوبة تنقلهم داخل القرية.
ويقول البنا: “في موقف وجع قلبي، واحد من ذوي الهمم كان بينزل من التوكتوك عشان خمسة جنيه فرق الموقف ده خلاني أقول لازم نعمل حاجة، لازم نحس ببعض.”
هكذا يروي رامي أحد مؤسسي المبادرة، ورغم عدم حصولهم على دعم من أي جهة رسمية، نجح الشباب الثلاثة في كسب دعم الناس:”أول أسبوع الناس هي اللي شجعتنا في ناس كانت بتزود الأجرة بنفسها دعمًا للمبادرة، وكانوا بيقولوا ربنا يكرمكم، انتوا بتساعدوا ولادنا، حسينا فعلاً إن الخير بيولد خير.”
النتائج كانت ملموسة على الأرض، فقد وفرت المبادرة على أولياء الأمور مبالغ كبيرة، خاصة مع تعدد الدروس الخصوصية في اليوم الواحد.
“الطالب في الثانوي ممكن يروح في اليوم درسين أو تلاتة بدل ما يدفع 40 جنيه في المشوار، بيدفع 15 بس يعني الأسرة بتوفر فرق كبير في اليوم الواحد، وده مهم جدًا في الظروف دي.”
وحين سُئلوا عن رغبتهم في دعم رسمي أو من رجال الأعمال، قال رامي سعد البنا: إحنا مش مستنيين دعم مادي، بس لو في حد مؤمن بالفكرة ممكن يساعدنا نكبرها عندنا خطة نزود عدد العربيات ونخصص بعضها لخدمة الطلبة بالفرز، بحيث نغطي أكتر من منطقة ونوفر فرص شغل كمان.
ورغم عدم حصولهم على دعم من أي جهة رسمية، فإن “أهل الخير ما تأخروش، في أول أسبوع، كنا بنعاني ماديًا شوية، بس ربنا رزقنا بناس طيبة حتى محطة البنزين اللي بنمون منها، لما كنا بندفع 100 جنيه يقولوا لا حطوا 50 بس، والباقي دعم مننا عشان أنتوا بتساعدوا ولادنا، المواقف دي هي اللي بتدينا طاقة نكمل”.
ويختم مؤسسو المبادرة برسالة موحدة:”البلد دي محتاجة كل واحد فيها يبدأ بنفسه محدش هيغير الواقع غيرنا لو كل واحد قدم خير بسيط من مكانه، هنشوف فرق كبير ربنا بيقول: “إن الله لا يغير ما بقوم حتى يغيروا ما بأنفسهم”، وإحنا مؤمنين إن الخير دايمًا بيبدأ بخطوة.”
مبادرة “من 10 بقت 7 كلنا واحد” قد تبدو بسيطة في ظاهرها، لكنها تحمل بين طياتها رسالة عميقة:أن الثلاثة جنيهات التي تنازل عنها هؤلاء الشباب، كانت في الحقيقة خطوة بثلاث قيم – الرحمة، التعاون، والإيمان بأن الخير أقوى من الغلاء.
