في أسيوط عاصمة الفقر الرسمية، لم تعد الحالة الاقتصادية لها بالأمر العابر الذي يمكن تمر به أي محافظة، بل أصبح الأمر أكثر تعقيداً حيث تدنت الحالة الاقتصادية بالناس لدرجة عدم الشكوى من الغلاء، بل أصبحت الناس فى حالة تأقلم مع الغلاء.
حيث أن التضخم قضى على المرتبات، والأسعار ارتفعت وأصبحت لا تسد حاجة الأكل، وأصبح البديل هو “العيش الحاف، والأكل أصبح يعتمد على والرز والمكرونة،
66,7% فقر بمعنى أن فى أسيوط بيتين من كل ثلاث بيوت لا يستطيعون الحصول على الأكل الذي يكفيهم.
إحصاءات التعبئة العامة والإحصاء: ناقوس الخطر في القرى والنجوع
وفقاً لجهاز التعبئة العامة والإحصاء، أسيوط تتصدر المحافظات بنسبة فقر 66.7%, والأزمة متوحشة في القرى، يوجد بالمحافظة 207 قريه ضمن “أفقر 1000 قرية في مصر”، وفي أبنوب والفتح وصدفا تتجاوز نسب الفقر 80% وتصل لـ 100% في بعض النجوع.
المائدة اتغيرت: وداعاً للبروتين
المؤشرات الميدانية مرعبة، ريف أسيوط استغنى رسمياً عن اللحوم والدواجن والأسماك، وبقى الاعتماد الكلي على “نشويات رخيصة” تسد الجوع وخلاص.
وتحكي أم إبراهيم “ربة منزل من الفتح” بحسرة: “أنا أم وعارفة يعني ايه عيالي يطلبوا أكل ومقدرش أعمله ، كنا بناكل طبيخ ورز وفراخ، دلوقتي حلة مكرونة بتقعدنا يومين”.
وتكمل: “التموين والـ 6000 جنيه بتوع جوزي بيطيروا في الكهربا والأكل، وبنستلف علشان نعرف نكمل باقى الشهر.”
الأجور الهشة والأسعار القاسية: واقع معيشي ضاغط
قال السيد المحمدي “موظف”: “أنا بشتغل شغلتين، الصبح في التربية والتعليم، وبالليل سواق توك توك. وبرضه مش مكفي”.
ويشرح: “طبيعة الشغل هنا يومية. زراعة أو مباني مفيش قبض ثابت، اليوم اللي مفيهوش شغل يعني مفيش عشا، والـ 200 جنيه بتوع اليومية مبقوش يجيبوا كيلو لحمة”.
يوصّف الحاج محمود عزت “تاجر تجزئة بأسيوط” الحالة بالقول: “السوق ميت ومعظم البيع بقى بالآجل”.
وأضاف: “محدش بيشتري بروتين، كله بيدور على الأرخص اللي يملى البطن، أنا بضاعتي بتبوظ والتاجر بيشحت والمواطن جعان”.
تبخر القدرة الشرائية وإغلاق مبكر للأسواق
من جانبه قال أحمد كشك “مسؤول بالغرفة التجارية”: “القدرة الشرائية للمواطن الأسيوطي انهارت بنسبة تتعدى 60% خلال آخر سنتين”.
وأضاف: “المشكلة مزدوجة، المواطن مش لاقي يشتري، والتاجر مش عارف يبيع، الأسواق بتقفل بدري من يوم 10 في الشهر عشان السيولة خلصت”.
وتابع: “نطالب بفتح منافذ سلع مدعمة في الـ 207 قرية الأكثر احتياجاً، وتوفير فرص عمل حقيقية، المساعدات لوحدها مش هتأكل 2 مليون مواطن”.
جهود مكثفة ومحاولات لمواجهة عجز الدخل
وفي تصريح خاص لـ “القصة” قال حسن عثمان مدير مديرية التضامن بأسيوط: “الطلب على المساعدات زاد الضعف، عندنا 207 قرية محتاجة تدخل عاجل”.
وأكد: “بنوزع شنط وقوافل، بس ده مسكن، المشكلة في الدخل، لما الأجر اليومي ميكفيش يجيب وجبه متكامله، يبقى فيه حاجة غلط، والتضخم بيقضي على أي محاولات مننا، وبقينا مضطرين نقلل في حجم المساعدات علشان نقدر نغطي أكبر قدر من القرى المحتاجة”.
