كتب- إسلام مهدي:
قال حسام حسن، المدير الفني للمنتخب المصري، إن شعوب أوروبا أو أمريكا تثور، ويثور معها المهتمون بحقوق الإنسان وحقوق الحيوان أيضا إذا تعرض أي حيوان للأذى.
وأضاف خلال كلمته بالمؤتمر الصحفي قبل قليل: “لكن لما كل يوم إسرائيل تقتل آلاف البني آدمين وأطفال وسيدات لا نسمع شيء”.
وتابع: “نحن نعيش في منازل وربما قصور وتكييفات في الصيف وأنظمة تدفئة في الشتاء. لكن الشعب الفلسطيني يعيش في العراء”.
ووجه حسن سؤال للإنسانية: “مابيصعبش عليكم الأطفال اللي مش لاقيين ياكلوا في فلسطين؟. واللي ممكن يجيلهم مرض من قلة الأكل ومن سوء المعيشة؟”. وتابع: “أنا لو ماحسيتش بكل ده كبني آدم يبقى انا ماستاهلش أعيش. أو أي بني آدم على وجه الأرض، بغض النظر عن ديانته إذا ماحسش بالأطفال دي يبقى ماينفعش يعيش. لازم يكون لنا قرار، وخاصة الناس اللي في أيديها القرار تفكر أو تتخيل أولادها ممكن تعيش ولو يوم واحد بس حتى يقعدوا في الشارع في برد ومطر ولا حر وشمس بالشكل ده. السيول لما بتحصل في أي دولة بنجري نستخبى ونحتمي بأي حاجه، لكن لما بتحصل في غزة الناس دي مابقاش عندها مكان تستخبى فيه”.
وقال: “أنا بقول عار علينا جميعا. عار على العالم كله مش العرب بس. عار على متخذي القرار أنهم سايبين ناس زينا زيهم كده. احنا كلنا زي بعض. بقى عادي أن تضرب صاروخ ويموت بيه ٣ أو ٤ آلاف بني آدم واحنا كلنا عادي. وخاصة شعوب أوروبا وأمريكا اللي بيتصدرلهم صورة تانيه خالص”.
وأضاف: “لو حد أذى حيوان أو فيه فيديو لحد أذى كلب في الشارع ولا حاجه بنطلع كلنا نقول لازم يتحبس ولازم يتسجن ولازم يتحاكم. طب الصاروخ اللي بينزل يقتل بني آدمين بنغمض عنه ليه؟”.
وتابع: “أنا بقول الكلام ده بعيدا عن أي ديانة. بتكلم كإنسان. مش فارقه بقى عربي ولا أوروبي ولا أمريكي. أنا حسيت حاجه قولتها بعيدا عن جنسيتي أو ديانتي. أنا بقول اللي حسيته”.
واختتم المدير الفني لمنتخبنا الوطني حديثه قائلا: “رسالة من خلال كرة القدم، القوة الناعمة في العالم. أرجوكم كل الرياضيين وكل الإعلاميين باختلاف ديانتهم أو هويتهم، ابعتوا من خلال كأس العالم رسالة خلوا الشعب الفلسطيني يعيش. مش عايزين حاجه تاني، خليهم يعيشوا بس، يعيشوا لو سمحتم. وعادي زي ما فيفا بترفع شعار ريسبيكت، وفير، فاحنا كمان عايزين فير في حق الفلسطينين في الحياة. وعايزين ريسبيكت للبني آدم علشان يعيش ويكون فيه فير في المعيشة، بس وشكرا”.
